Muiderberch

Muiderberch (Nederlânsk: Muiderberg) is in doarp yn de eardere gemeente Muiden yn de provinsje Noard-Hollân. It doarp hat 3266 ynwenners (2005) en is ûntstien om 1200 hinne op in stuwwâl. Yn de omjouwing fan de Doarpsstrjitte binne by rioalearringswurken de âldste spoaren fan bebouwing fûn. Nei alle gedachten binne de alderâldste spoaren fan bewenning ferswolgen troch de Sudersee.

Floris V is yn 1296 by Muiderberch fermoarde. Yn it doarp leit in swerfstien as monumint. Piet Lieftinck is hjir yn 1902 berne. Yn 1991 waard yn it doarp in byldsje ûntbleate ta neitins oan it tientsje fan Lieftinck. Bekende Muiderberchers binne ûnder oare de komponist G.A. Heinze dy't dêr fan 1884 oant syn dea yn 1904 wenne en wurke en boargemaster Niënhuys Ruys (1899-1904) dy't mei-oprjochter en letter ek foarsitter wie fan de Vereeniging tot bevordering van het Vreemdelingenverkeer "Floris V", de foarrinder fan de hjoeddeiske VVV.

Muiderberch hat it grutste Joadske begraafplak fan Nederlân. It begraafplak is yn 1642 stichte troch Heechdútske joaden en by inoar brocht mei it dêrneist yn 1660 troch Poalske joaden stichte begraafplak. De ûntfangstromte en it metaarhûs komme út 1933. Se binne ûntwurpen troch Harry Elte.

By Muiderberch leit it knooppunt Muiderberch, dêr't de A1 en A6 op elkoar oanslute. It knooppunt is bekend fanwege de filemeldingen. Der wiene desennia lang plannen om de A6 troch te lûken nei de A9. Dy oanlis foarme in bedriging foar it oangrinzjende natoergebiet de Naardermar en kaam te ferfallen troch de kar foar útwreiding fan de al besteande wei.

Muiderberch is ien fan de âldste baaiplakken fan Amsterdam. De measte minsken út Muiderberch wurkje yn Amsterdam.